സ്പാനിഷ് ഫുട്ബോൾ ക്ലബ് എഫ് സി ബാഴ്സലോണയുടെ നവീകരിച്ച ഫുട്ബോൾ സ്റ്റേഡിയമായ ക്യാംപ് നൗവിലേക്ക് അപ്രതീക്ഷിത സന്ദർശനം നടത്തി മുൻ ബാഴ്സ താരം ലയണൽ മെസ്സി. ഇന്നലെ രാത്രി തനിക്ക് ഒരുപാട് മിസ് ചെയ്യുന്ന ഒരു സ്ഥലത്തേയ്ക്ക് മടങ്ങിയെത്തിയെന്ന് സന്ദർശന ശേഷം മെസി പ്രതികരിച്ചു. ഒരു ദിവസം ഇവിടേയ്ക്ക് തിരിച്ചുവരാൻ കഴിയുമെന്ന് പ്രതീക്ഷിക്കുന്നതായും താരം കൂട്ടിച്ചേർത്തു.
'ഇന്നലെ രാത്രി, എൻ്റെ ഹൃദയത്തിൽ എപ്പോഴും നഷ്ടബോധമുള്ള ഒരു സ്ഥലത്തേയ്ക്ക് ഞാൻ മടങ്ങിയെത്തി. ഞാൻ ഒരുപാട് സന്തോഷിച്ചിരുന്ന സ്ഥലം. ലോകത്തിലെ ഏറ്റവും സന്തോഷമുള്ള വ്യക്തിയെക്കാൾ ആയിരം മടങ്ങ് അധികമാണ് ഞാൻ ഇവിടെ സന്തോഷിച്ചത്. ഒരു ദിവസം എനിക്ക് ഇവിടേക്ക് തിരിച്ചു വരാൻ കഴിയുമെന്ന് ഞാൻ പ്രതീക്ഷിക്കുന്നു. ഒരു കളിക്കാരനെന്ന നിലയിൽ വിട പറയാൻ മാത്രമല്ല ഞാൻ ഇവിടേയ്ക്ക് വരാൻ ആഗ്രഹിക്കുന്നത്. ഒരു അവസരം ഉണ്ടായില്ലെങ്കിൽ പോലും…' പൂർത്തിയാക്കാത്ത ഏതാനും വാചകങ്ങൾ ലയണൽ മെസ്സി ഇൻസ്റ്റാഗ്രാമിൽ കുറിച്ചു.
മെസ്സിക്ക് മറുപടിയുമായി ബാഴ്സലോണയും രംഗത്തെത്തി. ലിയോ താങ്കൾക്ക് എപ്പോഴും ഇവിടേയ്ക്ക് സ്വാഗതമെന്ന് ബാഴ്സ സമൂഹമാധ്യമങ്ങളിൽ കുറിച്ചു. 2005ലാണ് മെസ്സി ബാഴ്സലോണയ്ക്ക് വേണ്ടി അരങ്ങേറ്റം കുറിക്കുന്നത്. 781 മത്സരങ്ങളിൽ അർജന്റീനൻ ഇതിഹാസം ബാഴ്സലോണയുടെ കുപ്പായം അണിഞ്ഞു. 674 തവണ ബാഴ്സയ്ക്കുവേണ്ടി മെസ്സി ഗോളുകൾ നേടി. 10 ലാലീഗയും നാല് ചാമ്പ്യൻസ് ലീഗും ഏഴ് കോപ്പ ഡെൽ റെയും മെസ്സി ബാഴ്സയിൽ സ്വന്തമാക്കി.
2021ലാണ് മെസ്സി ബാഴ്സ ബന്ധത്തിന് അവസാനമായത്. കൊവിഡ് കാലത്തുണ്ടായ കടുത്ത സാമ്പത്തിക പ്രതിസന്ധിയെ തുടർന്ന് താരത്തെ കൈവിടാൻ ബാഴ്സ മാനേജ്മെന്റ് നിർബന്ധിതമായി. നീണ്ട 16 വർഷത്തിന് ശേഷമാണ് മെസ്സി ബാഴ്സ വിട്ടിറങ്ങിയത്.
Content Highlights: Messi sends message to Barcelona fans after secret Camp Nou visit